- Para a próxima semana xa hai fixadas outras sete visitas escolares e de Centros de Día

- Os grupos poden solicitar cita chamando aos números de teléfono 986 55 94 56 ou 630 95 25 15

^{Valga, 15 de decembro de 2018.}

^{Escolares de Valga, Pontecesures e Boiro e outros colectivos chegados dende Ferrol, Ames e Vilagarcía estrearon durante esta semana as visitas concertadas ao Belén Artesanal en Movemento.}

^{A primeira das visitas organizadas tivo como protagonistas o pasado luns a cincuenta persoas da Residencia Mixta de Maiores de Ferrol. Os usuarios deste centro público non coñecían ata o de agora o nacemento de Campaña, xa que este foi o primeiro ano que a residencia organizou esta excursión. A animadora sociocultural do centro descubriu o Belén Artesanal a través das redes sociais e decidiu traer aos maiores para que gozaran coa súa envergadura e todos os seus contidos.}

^{O martes foi o turno dos 56 alumnos do Centro Rural Agrupado de Valga (CRA), integrado polas escolas unitarias de Forno, Ferreirós, Vilarello, Chenlo, Campaña e Xanza. Os rapaces, de entre 3 e 5 anos de idade, contemplaron abraiados cada unha das figuriñas e esceas do nacemento, ao igual que fixeron o o mércores os pequerrechos da Escola Infantil de Pontecesures.}

^{Continuando coa actividade escolar, o xoves pola mañá achegáronse ata o Belén medio cento de alumnos de 3º e 5º cursos do CEIP Praia Xardín de Boiro. Tamén neste caso foi a primeira vez que o centro organizou unha visita ao Belén Artesanal e fíxoo como parte da asignatura de relixión. Os rapaces trouxeron fichas para cubrir e tiveron que percorrer todo o nacemento buscando as respostas ás preguntas que lles plantexaron as súas mestras.}

^{Tamén o xoves estiveron en Campaña un grupo de once persoas da Asociación de discapacitados intelectuais Arcea, do Milladoiro (Ames) e o venres fixeron o propio os usuarios da Fundación Lar, de Vilagarcía. Durante a xornada de hoxe está prevista a chegada de varias excursións a Campaña.}

^{Ademais destas citas concertadas, o Belén Artesanal continúa recibindo moitísimas outras visitas no seu horario habitual de apertura. As cifras están a ser de récord e, de feito, durante a primeira semana foron máis de dez mil as persoas que acudiron a velo.}

^{O nacemento, obra da asociación cultural Amigos do Belén, permanecerá aberto ao público de xeito gratuíto ata o 13 de xaneiro. Entre semana de 17:30 a 20:30 horas, os sábados de 17 a 20:30 e os domingos e festivos de 12 a 14 horas pola mañá e de 17 a 20:30 pola tarde. Os colexios, asociacións e outros grupos poden concertar as visitas a través dos números de teléfono 986 55 94 56 ou 630 95 25 15.}