- O presuposto municipal reserva 2’3 millóns para servizos sociais e destina 1.266.415 euros a inversións

 - O grupo de goberno aprobou en solitario a modificación puntual nº3 do PXOM, que beneficia ao empresariado de Valga

plenoorzamentos1

Valga, 1 de decembro de 2018.

 O Concello de Valga contará cun orzamento de 5.451.307 euros no vindeiro ano 2019. O presuposto foi aprobado onte no Pleno, recibindo nove votos a favor do grupo de goberno e dous en contra do grupo socialista.

O concelleiro de Facenda, José Ángel Souto, salientou que “son uns orzamentos feitos para a xente de Valga” e que “cumpren co obxectivo de estabilidade e a regra de gasto”. Referiuse a catro grandes apartados: os servizos sociais, aos que se destinan 2’3 millóns de euros; os servizos básicos, que suman 1’7 millóns de euros; inversións por valor de 1’2 millóns; e actuacións de carácter económico e xeral que supoñen tamén 1’2 millóns.

O anexo de inversións, que suma 1.266.415 euros, recolle partidas para a dotación e ampliación de servizos básicos. En concreto, mellora de viais e camiños, saneamento e adquisición de novos contenedores para o servizo de recollida de lixo. Tamén se contemplan medidas de aforro enerxétido e melloras no alumeado público, actuacións de mantemento en parques, xardíns e espazos naturais e en mobiliario urbano.

No tocante ao Patrimonio, prevense inversións no Centro de Interpretación da Caña do País e en equipamento para o Museo da Historia e outros recintos culturais. No apartado de Cultura resérvanse partidas por valor de 160.000 euros para a xestión da Escola Municipal de Música e de 100.000 euros para actividades de promoción cultural.

O presuposto reserva un total de 413.000 euros para investimentos en Educación, con partidas para as axudas municipais para a adquisición de material escolar e transporte, a financiación de actividades de conciliación e reforzo educativo e 164.000 euros para a Escola Infantil Municipal.

No tocante aos Servizos Sociais e Igualdade, o orzamento inclúe partidas por valor de 626.000 euros: 310.000 para a prestación do servizo de axuda a domicilio a persoas dependentes; 100.000 euros para o CODI, 52.000 euros para o Centro de Información á Muller, entre outras.

Por último, ao fomento do emprego o Concello destinará en 2019 máis de 600.000 euros. Continúase coas subvencións á contratación de parados do municipio, unha iniciativa de loita contra o desemprego que está a dar froitos. Neste sentido, o concelleiro Souto destacou que o número de parados en Valga baixou de 603 no ano 2015 a 350 en 2018. Outras partidas vencelladas ao emprego destinaranse á contratación de bolseiros por parte da administración local, a cursos e actividades formativas ou ao Obradoiro de Emprego Ulla-Umia III, que está a formar a vinte persoas desempregadas nas especialidades de albanelería e acondicionamento forestal.

O alcalde, José María Bello Maneiro, resaltou que o orzamento mantén sen cambios o cadro de persoal actual e reserva fondos suficientes para unha eventual subida do salario dos funcionarios e do persoal laboral que poida ser aprobada polo Goberno Central.

O outro punto da orde do día, a aprobación inicial da modificación puntual número 3 do Plan Xeral de Ordenación Municipal (PXOM), tamén foi aprobado só cos votos favorables do grupo de goberno. Esta modificación “beneficia a todo o empresariado de Valga”, explicou o alcalde, xa que se actualizan aspectos concretos da regulación de usos, parcelamentos, cómputo da edificabilidade e condicións de edificacións e, ademais, aclararase a interpretación de determinados aspectos da actual normativa urbanística.

Obras de saneamento no Plan Concellos

Trala sesión extraordinaria celebrouse un segundo Pleno urxente cun único punto na orde do día: a inclusión no Plan Concellos do proxecto “Saneamento no Concello de Valga”, por valor de 509.569 euros e que inclúe actuacións de ampliación e mellora da rede municipal de alcantarillado en lugares como Balleas, Outeiriño, Carballiño, Chenlo, Raxoi, Bronllo, Cernadas ou Vilar. Tamén contempla a instalación de dúas estacións depuradoras de augas residuais (EDAR) nas Cernadas e en Raxoi e un bombeo no Carballiño.

O asunto foi aprobado por unanimidade.

boton auditorio

boton edificio usos admin

boton casa cultura

boton codi

boton facebookboton twitter   boton youtube

boton sede electronica

boton bandos

boton bella otero

boton rueiro

boton tokapp

boton directorio

boton tempo

Volver