Accessibility Tools

NOVAS DO CONCELLO

- Os recoñecementos recaeron en once alumnos dos colexios de Baño e Ferro Couselo, do IES de Valga e da Escola de Música

- O subdirector xeral de Innovación Educativa da Xunta acompañou no acto ao alcalde, á concelleira de Educación e aos directores de todos os centros educativos do municipio

expedientess1

Valga, 28 de xuño de 2018.

O Concello de Valga rendeu onte homenaxe aos mellores estudantes dos centros educativos do municipio, nun acto celebrado no Auditorio e que contou coa presenza do subdirector xeral de Ordenación e Innovación Educativa e de Formación do Profesorado da Xunta de Galicia, Manuel Vila López. Participaron no recoñecemento o alcalde de Valga, José María Bello Maneiro, a concelleira de Educación, Carmen Gómez, e os directores da Escola Infantil Municipal, o Centro Rural Agrupado, os colexios de Baño e Ferro Couselo, IES de Valga e da Escola Municipal de Música.

Foron once os homenaxeados. Os galardóns aos mellores expedientes de Educación Primaria recaeron en Ximena Guerra Lestido, do CEP Xesús Ferro Couselo, e Rosalía Muíño Cotón, do CEIP Plurilingüe Baño-Xanza. En Educación Secundaria Obrigatoria foi recoñecido Martín Calvo Blanco, mentras que en Bacharelato os mellores expedientes foron os de Lara Padín Rodríguez, na rama de Ciencia e Tecnoloxía, e Manuel Romero Ferreirós e Andrea Rodríguez Seco na modalidade de Humanidades e Ciencias Sociais.

Na Formación Profesional Básica o alumno máis destacado foi José Ángel Sanmartín Martínez. No Ciclo Medio de Soldadura e Caldeiraría o recoñecemento recaeu en Sara Iglesias Rodríguez e no Ciclo Superior de Construcións Metálicas, en Hugo Mosquera Vicente. Por último, os dous estudantes máis brillantes da Escola Municipal de Música durante o curso recén rematado foron Lorena Rodríguez Gómez, alumna de Grao Superior na especialidade de clarinete, e Roi Barros Germiñas, máster na especialidade de saxofón.

Os galardoados recibiron un diploma, una placa e unha tablet como agasallo.

No turno de intervencións, algúns dos estudantes homenaxeados tomaron a palabra para agradecer o traballo do profesorado dos seus respectivos centros e o apoio das súas familias, determinantes para conseguir estes éxitos. Tiveron tamén palabras de recordo para os compañeiros que puxeron todo o seu esforzo durante o curso pero que, sen embargo, non acadaron os resultados agardados e aplaudiron a iniciativa do Concello por enxalzar, con estes recoñecementos, os valores do esforzo.

O alcalde, José María Bello Maneiro, destacou que os bos resultados académicos destes e outros moitos mozos valgueses son froito do traballo conxunto de toda a comunidade educativa. Sobre os alumnos galardoados dixo que “son un orgullo para Valga” e desexoulles “que sigan colleitando éxitos nas seguintes etapas formativas e profesionais”. Pola súa parte, o subdirector xeral da Xunta salientou a importancia de que “un Concello recoñeza os valores da educación” con actos coma o de onte.

Por último, Roberto Barral, que remata a súa etapa como director e docente do IES de Valga, falou en representación dos centros educativos de Valga e referiuse á “colaboración” coa que contan por parte do Concello, importante, dixo, para reforzar e dar visibilidade ao traballo que realizan.

expedientess2 expedientess3 expedientess4 expedientess5 expedientess6

boton facebookboton twitter   boton youtube

boton cita previa sede

boton extensions

boton sede electronica

boton bandos

boton rueiro

boton tempo

boton obradoiro

Volver