- As concelleiras Begoña Piñeiro e Ramona Otero inauguraron a exposición, que pode verse ata o 30 de xuño

- A artista compaxina a súa afección á pintura coas actividades benéficas a través da Asociación Española Contra o Cancro

^{Valga, 16 de xuño de 2018.}

^{A viguesa Alicia Sarmiento Peña, “Malís”, expón no Auditorio Municipal a mostra “Sueños rotos”, que inauguraron onte pola tarde as concelleiras Begoña Piñeiro e Ramona Otero en presencia da artista, os pintores locais Pepe Potel e Ángeles Garrido e o presidente da asociación Adeval, José María García.}

^{Enxeñeira de telecomunicacións xubilada, “Malís” reúne nesta exposición 47 obras pintadas ao longo dos últimos anos. “Os cadros son reflexo dos meus sentimentos en cada momento e a mostra, unha mirada atrás a unha etapa da miña vida coa que quero romper emocionalmente. Representa o peche dunha porta para abrirme a outro tipo de pintura”, explica Alicia Sarmiento.}

^{Foi en 1994, durante unha época que pasou no paro, cando “Malís” comezou a achegarse á pintura. “Cun libro e algún material que comprei, empecei eu soa a pintar e terminou enganchándome. Foi moi importante para min nese momento”.  Acode habitualmente a dous estudos en Vigo: o de Concepción Cuadrado, de pintura ao óleo, e o de Puri del Palacio, de pintura con acrílico. Neles “collo diferentes técnicas” que despois aplica ás súas obras.}

^{A mostra “Sueños rotos” pode verse ata o vindeiro 30 de xuño. A concelleira Begoña Piñeiro destacou durante a presentación que a sala de exposicións do Auditorio segue a dar cabida cada mes a artistas tanto de Valga como doutras zonas de Galicia e referiuse non só ás capacidades de Alicia Sarmiento para a pintura, senón tamén á súa condición de vicepresidenta da xunta provincial da Asociación Española Contra o Cancro en Pontevedra. O Concello leva anos recaudando fondos para este colectivo cun festival benéfico que se celebra no Nadal.}