- Acudiron á función alumnos de 3º e 4º da ESO de catro centros educativos

- A actividade foi promovida por Editorial Galaxia co gallo do Día das Letras Galegas

^{Valga, 31 de maio de 2018.}

^{A obra de teatro “Anagnórise” reuniu esta mañá no Auditoiro Municipal a douscentos estudantes de 3º e 4º cursos de ESO do IES de Valga, o Aquis Celenis de Caldas de Reis e os institutos Macías o Namorado e Camilo José Cela de Padrón.}

^{Asistiron á adaptación teatral da obra de María Victoria Moreno, autora homenaxeada este ano no Día das Letras Galegas, que correu a cargo dos actores Fran Núñez e Brais Iriarte, da compañía Limiar Teatro. “Anagnórise” é unha road movie que conta a historia de Nicolau, un mozo dunha vila das Rías Baixas que decide fuxir a Madrid facento autostop. A muller que o recolle, Xulia, ten máis que ver con el do que nunca podería imaxinar.}

^{O espectáculo teatral discorreu no desguace ao que chega o coche de Xulia tralo fatal accidente que desencadea “Anagnórise”. Dous operarios comezan a desmontaxe do vehículo e cada peza remite a un momento da historia: dende a parada a tomar pulpo ata o derradeiro café en Madrid.}

^{Esta historia de María Victoria Moreno xa era coñecida para os estudantes, que previamente traballaron coa obra nos seus respectivos centros educativos por iniciativa de Editorial Galaxia, editora do libro e promotora tamén da función teatral como unha sorte de experiencia cultural completa para os mozos.}