- Na décima edición do campionato participaron 306 karatekas de 22 clubs de Galicia e Portugal

- O concelleiro de Deportes, Manuel Ferreiro, participou na entrega de medallas e felicitou ao club local polo éxito

^{Valga, 9 de marzo de 2026.}

^{O pavillón de Beiro foi esta fin de semana o epicentro da actividade deportiva en Valga. Alí congregáronse máis de 300 deportistas que participaron no X Campionato de Karate, unha cita que se desenvolveu na xornada do sábado con karatekas de 22 clubs chegados dende toda a xeografía galega e tamén do norte de Portugal.}

^{Durante a mañá disputáronse os encontros das categorías superiores (cadete, júnior e sénior) e, pola tarde, foi a quenda de prebenxamíns, benxamíns, alevíns, infantís e xuvenís.}

^{En representación do Concello asistiu o concelleiro de deportes, Manuel Ferreiro, que participou na entrega de medallas e aproveitou para felicitar ao Club Karate de Valga non só pola organización do Campionato senón tamén polo labor que realiza para o fomento da práctica deportiva. Conta con 70 deportistas federados nas súas tres escolas de Valga, Lavacolla e Casa Agraria en Santiago.}

^{No torneo do sábado, o Club Karate de Valga participou cunha delegación de 45 deportistas e, por primeira vez nestas dez edicións, acadou o primeiro posto no medalleiro, cun total de 20 metais: 6 ouros, 4 pratas e 10 bronces:}

^{Foron campións:}

• ^{Noa Sánchez en Kata Alevín}
• ^{Carmen Rodríguez en Kata Xuvenil}
• ^{Carla García en Kumite Alevín <32}
• ^{Leo Otero en Kumite Xuvenil <42}
• ^{Matilda Alonso en Kumite Xuvenil >52}
• ^{Ana Otero en Kumite Sénior <61}

^{Subcampións:}

• ^{Ana Otero en Kata Sénior}
• ^{Noa Sánchez en Kumite Alevín <32}
• ^{Julia Rial en Kumite Alevín >32}
• ^{Mateo Vigo en Kumite Xuvenil <42}

^{Medallas de bronce:}

• ^{Mario Mare en Kata Benxamín}
• ^{Lía Sánchez en Kata Benxamín}
• ^{Artai Valiña en Kumite Alevín Open}
• ^{Marta Leis en Kumite Alevín <32}
• ^{Iñaki Vázquez en Kumite Infantil >40}
• ^{María Ángeles Diego en Kumite Infantil >42}
• ^{Vera Beiroa en Kumite Infantil >42}
• ^{Carmen Rodríguez en Kumite Xuvenil <42}
• ^{Icia Reboiras en Kumite Xuvenil <52}
• ^{Lucía Touceda en Kumite Júnior Open}