- Na reunión, na que tamén participou o alcalde, abordáronse os principais retos do mercado laboral

- Bello Maneiro abriuse a ceder ás empresas locais a Escola Taller para que formen aos seus traballadores

^{Valga, 17 de febreiro de 2026.}

^{Empresarios de Valga participaron esta mañá nunha xuntanza co conselleiro de Emprego, José González, na que se abordaron os principais retos do mercado laboral e se informou dos incentivos á contratación, co obxectivo de potenciar a empregabilidade da cidadanía e a competitividade do tecido produtivo. Esta cita xurdiu da reunión de traballo anual cos empresarios locais que, organizada polo Concello, se celebrou o pasado 3 de febreiro para coñecer as principais inquedanzas do sector a nivel local.}

^{O conselleiro estivo acompañado polo Secretario Xeral de Emprego, Pablo Fernández; o alcalde, José María Bello Maneiro; e a concelleira de Formación e Emprego, Carmen Gómez. Presentou o programa “Galicia Suma Talento: Emprégate”, de axudas á contratación das persoas desempregadas con maiores dificultades de inserción laboral, así coma outras liñas ás que poden acollerse as empresas para fomentar, por exemplo, a contratación indefinida. En canto á formación para o emprego, apostou por un modelo áxil, flexible e conectado co mercado laboral, tendo en conta a demanda real das empresas.}

^{As dificultades para atopar persoal cualificado é unha das principais eivas para as empresas e, neste ámbito, o conselleiro remarcou que Galicia aposta por un modelo de inmigración ordenada baseado na integración laboral real a través, primeiro, do retorno de galegos no exterior e, nun segundo termo, na atracción de talento procedente de terceiros países.}

^{Por outra parte, José González tamén se referiu ao apoio ao colectivo autónomo, ao comercio local  ao “emprendemento tradicional”, co obxectivo de fomentar profesións actualmente en decadencia e garantir a remuda xeracional.}

^{O alcalde agradeceu ao conselleiro “que veña a Valga por segunda vez en apenas 15 días para presentar as ferramentas das que dispón a Consellería e das que poden beneficiarse as nosas empresas”. Bello Maneiro incidiu na necesidade de “traballar da man dos empresarios, xa que eles son os verdadeiros creadores de postos de traballo e son os que mellor coñecen a situación do mercado laboral”.}

 ^{Neste sentido, o rexedor ofreceu ás empresas locais a posibilidade de asinar convenios para que poidan empregar as instalacións da Escola Taller para formar aos seus traballadores. Así mesmo, engadiu “o Concello está á vosa disposición para servir de enlace ante a Xunta de Galicia e transmitirlles as vosas necesidades”.}