- Augas de Galicia celebrou esta mañá no Auditorio unha xornada técnica na que se analizaron alternativas para previr os asolagamentos

- O alcalde e o director de Augas inauguraron o simposio, no que se puxo a Valga como modelo “do que se pode facer” no resto do territorio galego

^{Valga, 29 de xaneiro de 2026.}

_{O Auditorio Municipal acolleu durante esta mañá unha Xornada Técnica de Augas de Galicia sobre “Actuacións de preservación dos recursos hídricos, os seus ecosistemas e preparación, protección e resposta fronte a inundacións na demarcación Galicia-Costa”. O alcalde, José María Bello Maneiro, e o director de Augas de Galicia, Roi Fernández, foron os encargados de inaugurar o simposio no que, a través de expertos, se abordou a xestión do risco de inundacións dende diferentes perspectivas.}

_{As obras executadas nos últimos anos en Valga no regato do Soutiño, en diferentes tramos do río Valga e tamén no río Louro puxéronse de exemplo “do que se pode facer no resto do territorio” galego. E, de feito, os asistentes participaron nunha visita de campo á obra “Mellora do espazo fluvial do río Louro entre a estrada PO-548 e a liña do ferrocarril”, executada entre os anos 2024 e 2025 e á que se destinaron 330.000 euros en base a un convenio asinado entre o Concello e Augas de Galicia. No marco do mesmo acordo tamén se investiron máis de 208.000 euros na Mellora do río Valga na súa marxe dereita, na contorna do Parque Dios Mosquera.}

_{Ademais, están pendentes de executar 2.181.354’46 euros noutras dúas actuacións: “Mellora do espazo fluvial do río Valga entre a liña do ferrocarril e a rúa Devesa” e a “Mellora hidráulica dos ríos Valga e Soutiño”, proxectos cos que se tratará de minorar os efectos dos asolagamentos. “O risco cero non existe”, sinalou Roi Fernández, “pero temos que traballar para minimizalo con enfoques máis sostibles e adaptados á realidade actual na que cada vez son máis frecuentes os fenómenos meteorolóxicos”.}

_{A DINA e os estragos que causou en Valencia no ano 2024 “provocou un cambio de paradigma” a nivel nacional e a “despregadura de máis investimentos para proxectos de mantemento e conservación fluvial. Pero en Galicia xa levamos anos anticipándonos” a esta tendencia.}

_{O alcalde, pola súa parte, puxo en valor o resultado das actuacións levadas a cabo no municipio para evitar as riadas. “Fai anos, Protección Civil tiña que ir coa zodiac tres ou catro veces ao ano a sacar a veciños das súas casas. As obras executadas foron moi importantes para mellorar a situación destes veciños e que poidan vivir máis tranquilos”, concluíu.}