- Os servizos de emerxencias manteñen baixo vixilancia os entornos fluviais debido ás persistentes chuvias

- Outros operarios municipais de obras ou electricistas tamén tiveron que actuar ante os danos causados polo temporal

^{Valga, 27 de xaneiro de 2026.}

^{Aínda que Valga non estaba incluída na alerta vermella emitida polos servizos meteorolóxicos ante o paso da borrasca Joseph, as súas consecuencias deixáronse notar durante a xornada de onte en distintos puntos do concello, especialmente na contorna das concas fluviais dos ríos Valga e Louro. As persistentes chuvias e as rachas de vento obrigaron á Policía Local e á agrupación de Protección Civil a permanecer en alerta constante e a realizar intervencións por caídas de árbores, asolagamentos ou incidencias en vivendas.}

^{Foron varias as estradas que se viron afectadas polo temporal. Por exemplo, a EP-8505 entre Ferreirós e Vilar, onde foi necesario retirar unha árbore caída no punto quilométrico 5’2 e que ocupaba toda a calzada. Tamén se rexistraron caídas ramas e restos de árbores na estrada autonómica PO-548, no km. 5;  e na vía PO-190, onde outro tronco quedou atravesado sobre o asfalto.}

^{Tamén a consecuencia do vento, foi necesario retirar contedores do lixo o carteis publicitarios que obstaculizaban a circulación de vehículos en diversos tramos de estradas.}

^{No que respecta ás precipitacións intensas acumuladas nas últimas xornadas, estas están a provocar fortes crecidas nos cauces fluviais, que están a ser revisados regularmente polos efectivos de emerxencias. Os asolagamentos fixeron necesario pechar os enlaces Baño-Carballiño e Senín-Cerneira e os pasos inferiores á vía do ferrocarril no Forno e na Devesa. Tamén se cortou unha ponte sobre o río Louro no Forno e sinalizouse un tramo da PO-548 á altura do punto quilométrico 2’4 por mor de bolsas de auga. Ademais, limpáronse arquetas de pluviais para facilitar o desaugamento.}

^{Á marxe das infraestruturas públicas, os servizos de emerxencia valgueses tamén actuaron nas últimas horas en varias vivendas. Nunha delas, no lugar do Pumariño-Devesa, colocaron unha bomba de achique na entrada, que quedou asolagada polo desbordamento do río Valga, impedindo o acceso. Neste punto está prevista a execución dun proxecto de prevención das inundacións, que está pendente de licitar por parte de Augas de Galicia.}

^{Noutro caso foi un garaxe o que acabou anegado, realizándose un desvío provisional das augas e, por último, colaboraron na atención dunha persoa maior que sufriu unha caída no seu domicilio e non conseguía levantarse.}

^{De cara ás próximas horas, para as que seguen activadas diversas alertas, mantense a vixilancia sobre os ríos e zonas especialmente vulnerables ante posibles desbordamentos. En áreas coma o Parque Irmáns Dios Mosquera o acceso atópase restrinxido para evitar posibles incidencias.}

^{Outros servizos do Concello}

^{Ademais das emerxencias, operarios doutros departamentos municipais coma o de Obras ou os electricistas tamén tiveron que actuar para reparar danos causados polo temporal. Árbores caídas danaron o cableado do alumeado público en Bronllo e Desabanda e outro caeu sobre o bombeo da rede de saneamento municipal na Devesa.}