- A actividade, que inclúe pintura e outras disciplinas, é impartida por Ángeles Garrido no CODI

- O vindeiro luns dará comezo a última das actividades de envellecemento activo organizadas polo Concello: as andainas

^{Valga, 21 de novembro de 2025.}

^{Dende comezos desta semana estase a poñer en marcha a programación do Concello para promover o envellecemento activo e hoxe foi a quenda do obradoiro de expresión artística, que deu comezo no CODI cun total de 16 persoas inscritas.}

^{Como é habitual, Ángeles Garrido encárgase de dirixir esta actividade na que moitos dos participantes atopan na pintura e outras disciplinas artísticas unha terapia coa que estimular as súas capacidades cognitivas e afectivas, mellorar o seu benestar emocional, traballar a psicomotricidade e a coordinación, e desenvolver a creatividade e a imaxinación. Ao mesmo tempo, foméntanse as habilidades sociais e as relacións interpersoais.}

^{Hai novas incorporacións de alumnos que, nestes vindeiros meses, farán as súas primeiras probas cos pinceis, pero este obradoiro tamén conta con adeptos que suman xa anos de participación e experiencia no mundo artístico. “Aquí veñen a experimentar con liberdade. Séntense libres para elixir que tipo de materiais e técnicas queren empregar, sen estar sometidos a ningún modelo”, explica Ángeles Garrido. Hai quen pinta tellas ou decora obxectos de vidro, outros prefiren pintar sobre lenzo ou incluso debuxar.}

^{Na primeira xornada do obradoiro, os participantes foron agasallados polo Concello cunha bolsa na que poden gardar os seus utensilios de pintura, unha libreta e un lapiseiro.}

^{Ao non formarse grupo suficiente no Auditorio, as inscritas da zona de Cordeiro foron trasladadas ata o CODI, en Baño, nun vehículo municipal.}

^{A inscrición nestas actividades, dirixidas a maiores de 55 anos, manterase aberta durante todo o curso, entregando a folla de inscrición no Rexistro do Concello ou a través do teléfono 621 204 615.}