- Deste xeito poñen en práctica os coñecementos sobre o oficio que previamente adquiriron nas sesións teóricas

- O proxecto formativo, no que participan dezaseis mozos, remata o vindeiro mes despois dun ano de formación

^{Valga, 29 de setembro de 2025.}

^{O alumnado da especialidade de forestais do Obradoiro de Emprego xuvenil está a apurar as últimas obras incluídas neste proxecto formativo, que se clausurará a mediados de outubro. Nas últimas xornadas os traballos centráronse na zona do Miradoiro de Beiro, onde os aprendices recibiron a visita da concelleira de Emprego, Carmen Gómez, quen comprobou a aplicación práctica de todos os coñecementos que os mozos adquiriron nos últimos meses. Ademais, agradeceulles a súa implicación durante este ano de formación que está a piques de rematar.}

^{En Beiro, os novos traballadores forestais, que sairán do Obradoiro cun certificado de profesionalidade que lles abrirá oportunidades laborais, executaron traballos de limpeza de maleza, realizaron rozas con fío e disco e acondicionaron as escaleiras de acceso ao miradoiro e ao muíño de vento.}

^{Con anterioridade, este grupo ao que dirixe o experto docente José Luis Cancela Martínez, pasou tamén por outras zonas verdes e espazos de lecer de Valga. Entre eles as lagoas Mina Mercedes e Porto Piñeiro, os arredores do tanatorio municipal e o colexio Ferro Couselo, ou Parque Dios Mosquera e a contorna da Casa da Caña, nos que realizaron actuacións de acondicionamento e mantemento.}

^{Outras das obras que executaron foron a poda das camelias na Praza Manuel Vicente Cousiño de Pontevalga, o embelecemento dos buxos na Casa da Cultura, a corta de árbores na área fluvial de Vilarello e a limpeza e colocación de malla antiherba na estación depuradora.}

^{O Obradoiro de Emprego Xóvenes, que desenvolven conxuntamente os concellos de Valga, Moraña e Portas, está a formar a un total de dezaseis persoas nas especialidades de albanelería e traballos forestais. O proxecto é cofinanciado polo Fondo Social Europeo Plus no marco do programa FSE + Galicia 2021-2027.}