- Os bares inscritos son Caprichos, Maneiro, Pontellón, Couceiro, Auditorio, Vilarello Paradise, Pardal e Pirata

- A cita gastronómica desenvolverase as dúas últimas fins de semana de agosto

^{Valga, 12 de agosto de 2025.}

^{A Ruta-Concurso “Tapa a Anguía”, que o Concello convoca anualmente dentro da programación da Festa da Anguía e Mostra da Caña do País, contará con oito establecementos participantes na súa duodécima edición: Pastelería Caprichos, Bar Maneiro, Café-Bar Couceiro, Cafetería Auditorio, Bar Pardal, Café Pub Pirata, O Pontellón Café-Bar e Vilarello Paradise.}

^{A actividade gastronómica trata de promocionar un dos produtos estrela da festa, a anguía, e incentivar o consumo nos locais de hostalería do municipio. O Concello será o encargado de facerlles chegar o peixe xa limpo para que poidan preparar as tapas.}

^{A ruta prolongarase durante as dúas últimas fins de semana do mes de agosto. O apartado de concurso celebrarase unicamente os días 23 e 24, mentres que na seguinte fin de semana (días 30 e 31 de agosto) tan só haberá degustación. Os petiscos serviranse de xeito gratuíto coas consumicións os sábados en horario de 12:00 a 15:00 e de 20:00 a 23:00 e os domingos de 12:00 a 15:00 horas.}

^{O público decidirá cos seus votos cales son as mellores tapas e, polo tanto, os locais gañadores dos Mandís de Ouro, Prata e Bronce. Para participar na votación é preciso reunir os selos dos bares participantes despois de degustar as súas tapas e introducir a papeleta nas urnas habilitadas ao efecto. Entre todas as persoas que participen na elección das mellores tapas sortearanse dez vales de 30 euros cada un para gastar no comercio local.}

^{Mantense, ademais, o xurado profesional, que será o encargado de elixir a tapa que se degustará na Festa da Anguía do vindeiro ano 2026.}