- As obras, subvencionadas pola Consellería de Presidencia, están en proceso de contratación

- Colocarase unha varanda e unha cuberta no exterior e acondicionaranse os baños e a Oficina Técnica na planta baixa

^{Valga,  11 de agosto de 2025.}

^{Os servizos administrativos do Concello veñen de sacar a contratación unha nova obra que, neste caso, afecta á propia Casa Consistorial, na que se executarán melloras relacionadas coa accesibilidade exterior e traballos de acondicionamento en varias dependencias da planta baixa, co obxectivo de solucionar unha serie de problemas derivados da antigüidade do inmoble e ofrecer mellores e máis eficaces servizos á veciñanza.}

^{Nestas obras de acondicionamento realizarase un investimento de 50.000 euros, cofinanciados entre o Concello e a Consellería de Presidencia, Xustiza e Deportes a través dunha liña de axudas destinada á mellora das infraestruturas, dotacións e instalacións vencellados á prestación de servizos municipais.}

^{Os traballos a executar na parte exterior do edificio consisten na colocación dunha varanda de aceiro inoxidable, a modo de pasamáns, na rampla de entrada e tamén na instalación dunha cuberta que protexa das inclemencias meteorolóxicas.}

^{No interior, unha das zonas afectadas serán os baños da planta baixa, que sufrirán unha renovación integral que incluirá melloras na fontanería, no pavimento e nos alicatados e a colocación de novos inodoros, lavabos, papeleiras, toalleiros e secamáns. Tamén serán adaptados para persoas con mobilidade reducida.}

^{Outra das dependencias a acondicionar será a Oficina Técnica, coa colocación de novo mobiliario: mesas, cadeiras, armarios arquivadores e caixoneiras.}

^{Por último, o proxecto recolle actuacións nas ventás e cristaleiras das escaleiras de acceso á planta superior.}

^{As ofertas para optar á adxudicación das obras poden presentarse ata o 21 de agosto.}