- Os gañadores nas dúas modalidades daranse a coñecer o 30 de xullo, no aniversario do nacemento intelectual valgués

- O catedrático Marcial Gondar despídese do tribunal despois de 26 edicións destacando “o traballo do Concello en defensa da cultura galega e o esforzo por manter este certame”

^{Valga, 22 de xullo de 2025.}

^{O xurado da vixésimo sexta edición do Premio de Investigación Xesús Ferro Couselo reuniuse onte na Casa do Concello para deliberar sobre os traballos presentados ao certame e elixir aos gañadores das dúas modalidades. O tribunal estivo integrado por Xulio Rodríguez González, facultativo do Corpo Superior de Museos; Pegerto Saavedra Fernández, Catedrático de Historia Moderna da Universidade de Santiago; Marcial Gondar Portasany, Catedrático de Antropoloxía da Facultade de Filosofía e Ciencias da Educación da USC; e Pablo Sánchez Ferro, director do Arquivo Histórico Provincial de Ourense e neto de Xesús Ferro Couselo. A reunión estivo presidida polo alcalde, José María Bello Maneiro, e tamén participaron dous técnicos municipais, Santiago Chenlo e Vanessa Losada, que exerceu como secretaria.}

^{Foron cinco as propostas que se presentaron ao certame. Catro investigacións concorreron á primeira modalidade, dotada con 4.000 euros e referida a traballos de investigación de ámbito galego, dentro das especialidades de etnografía, paleografía, numismática, arqueoloxía, historia e historia da arte. O outro traballo presentouse á segunda modalidade, pola que se convoca unha bolsa de estudos para proxectos centrados en estudos históricos, etnográficos ou sobre persoeiros do municipio de Valga, dotada con 3.000 euros.}

^{Os gañadores das dúas modalidades daranse a coñecer o día 30 de xullo, cando se cumpren 119 anos do nacemento de Xesús Ferro Couselo.}

^{Este premio busca promover e incentivar os estudos actuais de investigación no campo das ciencias históricas e vén sendo convocado polo Concello dende o ano 1996, no que a Real Academia Galega dedicou o Día das Letras Galegas ao Fillo Predilecto de Valga e insigne figura da cultura galega.}

^{Esta foi a primeira vez que o xurado se reuniu de forma presencial dende a pandemia, con motivo da despedida dun dos integrantes: Marcial Gondar que, despois de 26 anos, deixará de formar parte do tribunal avaliador. “Foron uns anos estupendos, nos que formamos un grupo de xente que nos entendemos á perfección. Sempre conseguimos chegar a consenso. De feito, os fallos, foron sempre unánimes”, sinalou o Catedrático de Antropoloxía. Ademais, quixo destacar “o esforzo do Concello por manter este certame, dotándoo dunha cantidade significativa para os premios e editando as investigacións gañadoras”. Considérao “un traballo importante de defensa da cultura galega”.}

^{O alcalde, pola súa parte, transmitiu o agradecemento do Concello aos catro membros do xurado, que “durante todos estes anos veñen facendo un gran traballo. E dedicou unhas palabras de “especial” agarimo a Marcial Gondar “por estar con nós dende o comezo”.}

^{O rexedor agasallou aos catro cun exemplar do libro vencedor da pasada edición, “Galiza. S.A.” de Xerardo Pereiro, e cunhas botellas da augardente gañadora do último concurso da caña do país.}