- Os establecementos de hostalería que queiran participar na actividade gastronómica poden anotarse ata o 1 de agosto

- Os petiscos serviranse gratuitamente con cada consumición os sábados ao mediodía e á noite e os domingos ao mediodía

^{Valga,  3 de xullo de 2025.}

^{O Concello está xa a preparar a programación cultural, lúdica e gastronómica que se desenvolverá durante o mes de agosto con motivo da Festa da Anguía e Mostra da Caña do País, para poñer en valor estes dous produtos con raigame en Valga. Unha destas actividades é a duodécima edición da Ruta-Concurso “Tapa a Anguía”, orientada á participación de locais de restauración e hostalería de Valga.}

^{A ruta de tapas levarase a cabo, como é habitual, as dúas últimas fins de semana de agosto: os días 23, 24, 30 e 31. Os petiscos serviranse de forma gratuíta coas consumicións nos seguintes horarios: os sábados de 12:00 a 15:00 e de 20:00 a 23:00 horas, e os domingos ao mediodía.}

^{O Concello facilitará aos locais participantes a anguía, xa limpa, para a elaboración das tapas. Estas serán valoradas por un xurado profesional e, ademais, haberá tamén unha votación popular por parte das persoas que acudan a degustar os petiscos e que reúnan os selos dos establecementos participantes.}

^{O público decidirá cos seus votos cales son as mellores tapas e, polo tanto, os locais gañadores dos Mandís de Ouro, Prata e Bronce. Para participar na votación será preciso reunir os selos dos bares participantes despois de degustar as súas tapas e introducir a papeleta nas urnas habilitadas ao efecto. Entre todas as persoas que participen na elección das mellores tapas sortearanse dez vales de 30 euros cada un para gastar no comercio local.}

^{As diferentes receitas e elaboracións que ofrezan os locais serán tamén valoradas por un xurado profesional que elixirá, entre todas, a mellor tapa que poderá degustarse na Festa da Anguía do ano 2026.}

^{Os establecementos de hostalería teñen de prazo ata o día 1 de agosto para presentar as solicitudes de participación no rexistro do Concello ou a través da Sede Electrónica. A folla de inscrición pode descargarse a través da seguinte ligazón: https://www.valga.gal/atencion-cidada/impresos-solicitudes}