- Este módulo, de 15 horas de duración, foi impartido na Aula CeMIT do Auditorio

- O obxectivo é favorecer a incorporación dos aprendices ao mundo laboral unha vez rematen o período formativo

^{Valga, 16 de xuño de 2025.}

^{Os participantes no Obradoiro dual de Emprego Ulla-Umia, promovido polos concellos de Valga, Moraña e Portas e subvencionado pola Consellería de Emprego, continúan a recibir as materias complementarias incluídas dentro do programa formativo, coma a de inserción laboral e técnicas de busca de emprego, un módulo de 15 horas de duración que se impartiu na Aula CeMIT do Auditorio.}

^{O obxectivo desta formación é mellorar a empregabilidade do alumnado e proporcionarlles fórmulas e ferramentas de busca de emprego que lle faciliten a súa entrada no mercado de traballo.}

^{Entre os contidos teórico-prácticos incluídos no módulo atópanse a estrutura e tendencias do mercado laboral, as competencias profesionais e persoais ou as actitudes e a motivación na busca de emprego. En canto aos recursos para a busca de traballo por conta allea, fíxose fincapé nos diferentes canais de busca que os aprendices teñen á súa disposición (internet, portais de emprego, ETTs, bolsas de emprego...). Tamén se lles explicou como elaborar o currículo e a carta de presentación e como afrontar unha entrevista de traballo ou unha proba de selección.}

^{Outro dos aspectos nos que se incidiu foi na importancia da formación continua.}

^{Este módulo foi impartido pola titora do Obradoiro, Ana Lorenzo Rivas.}

^{Ademais desta formación específica, dende o comezo do Obradoiro de Emprego o equipo directivo e docente está a axudar aos participantes na elaboración dos seus currículos e realizando intermediación laboral con empresas e axentes sociais para facilitarlles a incorporación ao mundo laboral unha vez rematen o período formativo.}