- O espectáculo terá lugar o domingo 15 de xuño pola tarde, con entrada de balde

- O grupo infantil da Escola contou esta tempada con novas incorporacións, chegando aos 22 membros

^{Valga,  29 de maio de 2025.}

^{A Escola Municipal de Teatro está a piques de pechar un novo curso e farao, como de costume, coa representación de varias obras no Auditorio Municipal, levando así a escena todo o aprendido dende que, no pasado outono, deu comezo esta tempada.}

^{O espectáculo terá lugar o vindeiro 15 de xuño a partir das 19:00 horas, con entrada de balde para todo o público que queira asistir. Actuarán tanto os grupos infantís e xuvenil da Escola coma os adultos, que porán en escena tres representacións nas que as risas están aseguradas, pero nas que tamén se traballan os valores, especialmente cos máis cativos.}

^{As obras que protagonizarán estes actores e actrices afeccionados son:}

^{FABIOLA: No corazón da sabana vive Fabiola, a xirafa máis alta de todas as xirafas que ve o mundo dun xeito diferente. Unha historia de amizade e aprendizaxe sobre a importancia da comprensión e o valor da cooperación.}

^{POLOS PELOS: No fondo do bosque, onde as tesoiras cortan soas e os secadores falan, tres bruxas moi peculiares —Rula, Mecha e Escuma— rexentan unha perrucaría máxica con moito pelo... e moito conto. Pero esta non é unha tarde calquera: é Samaín, e os clientes que chegan non veñen por un simple peiteado. Unha comedia terrorífica, onde nada é o que parece, que che fará rir, arrepiar e —quen sabe— mirar con outros ollos aos monstros de sempre.}

^{PATIO DE LUCES: Comedia de portas que se abren, se pechan e se atrancan amosando a vida en todo o seu esplendor. Neste edificio nada escapa á mirada atenta de Lourdes, a porteira, que ten máis informes que o Concello. Aquí as escaleiras teñen oídos, as paredes contan chismes e as luces do patio acenden historias. Atréveste a entrar?}

^{Iria Acevedo Pérez é a mestra da Escola Municipal e deste curso que está a piques de rematar destaca as numerosas incorporacións que se produciron no grupo infantil, especialmente con nenos moi cativos de arredor de 3 anos de idade, que traballaron con outros mozos de ata 12 anos. “Produciuse un efecto chamada e contamos con moitos pequerrechiños” con moitas gañas de aprender, conta a mestra. De feito, “nunca queren que acaben as clases”, que chegan ás dúas horas de duración.}

^{Con este grupo infantil a metodoloxía de traballo esta baseada no xogo, a través dos que adquiren conceptos teatrais, traballan a improvisación e incluso crean as súas propias obras.}