- Dous cociñeiros elaboraron nunha foodtruck petiscos de choco, sardiña e mexillóns que despois degustaron os cativos

- A actividade, á que asistiu a concelleira de Educación, Carmen Gómez tamén incluíu unha charla didáctica sobre os produtos do mar e a súa pesca

^{Valga, 31 de xaneiro de 2025.}

^{A campaña Galicia sabe Amar, da Xunta de Galicia, regresou esta mañá a Valga pero, nesta ocasión, co obxectivo de chegar a un público moi específico: os máis cativos, para promover entre eles  o consumo de peixes e mariscos das rías galegas, así coma outros produtos da terra, todos eles avalados pola súa calidade.}

^{Unha das foodtrucks que periodicamente recorren Galicia elaborando diferentes receitas con produtos do mar estivo a primeira hora no colexio Xesús Ferro Couselo, ofrecendo petiscos ao alumnado de Educación Primaria. As tapas que puideron degustar foron croquetas de choco, que gustaron moito entre a rapazada e sorprenderon pola súa cor, e tostas de sardiña. Ademais, para celíacos e intolerantes á lactosa, os cociñeiros Abel González e Martín Medina prepararon unha terceira elaboración con mexillóns.}

^{Deste xeito, trátase de poñer en valor a versatilidade dos produtos do mar de Galicia e ás xentes que traballan na extracción, produción, comercialización e transformación das distintas especies para a súa posta a disposición dos consumidores.}

^{Pero a parte didáctica tivo nesta xornada se cabe máis trascendencia, xa que os estudantes participaron tamén nunha charla na que se lles falou sobre a importancia de levar unha alimentación saudable e que sexa equilibrada, consumindo todo tipo de alimentos.}

^{Ademais, nesta conferencia aprenderon moitas cousas sobre como se capturan e producen as diferentes especies do mar e, en concreto, os métodos máis tradicionais das rías galegas, coma as bateas ou as nasas.}