- A partir das 16:00 horas haberá obradoiros e inchables nos exteriores do Belén Artesanal

- Todos os nenos poderán saudar ás Súas Maxestades e recibirán un agasallo

^{Valga, 2 de xaneiro de 2025.}

^{Os Reis Magos de Oriente estarán en Valga este domingo, día 5, con motivo da tradicional recepción que terá lugar nos exteriores do Belén Artesanal en Movemento.}

^{Melchor, Gaspar e Baltasar saudarán a todos os rapaces valgueses e farán todo canto estea nas súas mans para cumprir os desexos dos cativos na xornada máis máxica do ano. Para recibilos por todo o alto, o Concello ten preparada unha tarde chea de actividades.}

^{A partir das 16:00 horas haberá inchables e obradoiros para que os nenos poidan divertirse mentres agardan polas Súas Maxestades. Mentres se desenvolven estas actividades, os Magos aproveitarán para visitar ás veciñas centenarias do concello para felicitarlles a entrada do novo ano en entregarlles un agasallo.}

^{A comitiva real ten prevista a súa chegada ao Belén arredor das 18:00 horas e será o alcalde, José María Bello Maneiro, quen se encargue de darlles a benvida.}

^{A continuación, como xa é habitual, entregaranse os premios do XXIII Concurso de Beléns e despois chegará o momento máis agardado por todos os nenos, que poderán subir a saudar a Melchor, Gaspar e Baltasar. Os Reis entregaranlles un pequeno regalo como anticipo de todos os que atoparán nos seus fogares na mañá do día 6.}

^{Para pechar a tarde haberá unha chocolatada con churros gratuíta para todos os asistentes.}