- Foron colocados na empresa Extrugasa e no restaurante Gran Barril, co obxectivo fomentar a separación e reciclaxe

- As obras financiáronse cunha subvención da Consellería de Medio Ambiente, Territorio e Vivenda

^{Valga, 26 de decembro de 2024.}

^{O Concello segue a estender a rede municipal de compostaxe, un sistema polo que vén apostando dende o ano 2020 para fomentar a correcta separación e reciclaxe do lixo orgánico xerado tanto nos domicilios particulares coma nos grandes produtores de biorresiduos do municipio.}

^{Os bos resultados acadados no colexio Baño-Xanza, que conta dende marzo de 2021 co seu propio centro de compostaxe no que se tratan os restos das 250 comidas diarias que se elaboran e serven no centro, levou ao Concello a implantar este mesmo método noutros dous grandes produtores de biorresiduos de Valga: a empresa Extrugasa, que conta con comedor propio para os seus traballadores, e o restaurante Gran Barril.}

^{Hai que ter en conta que a lei 7/2022 de Residuos e solos contaminados para unha economía circular obriga a recoller e tratar de forma separada os biorresiduos.}

^{Os traballos de instalación destes centros de compostaxe foron sufragados cunha subvención da Consellería de Medio Ambiente, Territorio e Vivenda, a través dunha orde de axudas dirixidas a entidades locais para desenvolver actuacións en materia de biorresiduos de competencia municipal, cofinanciada polo Fondo Europeo de Recuperación e Resiliencia da Unión Europea – Next Generation.}

^{Con este finaciamento adquiríronse as unidades modulares que integran ambos centros de compostaxe, executáronse as obras de montaxe das bases e colocáronse paneis informativos sobre o proceso para converter os residuos orgánicos en abono natural.}

^{Tamén está previsto dotar do seu propio centro de compostaxe ao Hotel Corona de Galicia, para o que xa foi instalada a base e foron adquiridos as unidades modulares de compostaxe que se colocarán proximamente.}

^{Servizo de préstamo de biotrituradoras}

^{Ademais, con esta mesma axuda tamén se adquiriu unha nova biotrituradora para ampliar o servizo de préstamo aos veciños adscritos ao programa municipal de compostaxe, que poden solicitar no Concello o empréstito gratuíto destas máquinas para moer restos leñosos procedentes de podas domiciliarias: ramas de árbores froiteiras e ornamentais, viña ou restos de xardinería.}

^{Deste xeito contribúese a eliminar estes residuos vexetais do circuíto de recollida do lixo, redúcese o número de queimas e minimízase o risco de incendio e contaminación ambiental, obtendo, ademais, un produto de valor engadido para o programa de compostaxe, xa que estes restos triturados poden ser empregados como material estruturante.}

^{Para solicitar o préstamo destas biotrituradoras é preciso contar cun composteiro individual no domicilio e cubrir unha folla de solicitude que está dispoñible tanto nas oficinas municipais coma na páxina web do Concello (https://www.valga.gal/atencion-cidada/impresos-solicitudes).}