- Instalarán unha malla antiherba no chan para evitar que medre vexetación e estenderán unha nova capa de area

- Nas últimas semanas tamén realizaron traballos de poda no pavillón de Baño e en Vilarello

^{Valga, 28 de febreiro de 2024.}

^{O alumnado do módulo de forestais do Obradoiro de Emprego Xóvenes II está a executar traballos no Parque Irmáns Dios Mosquera, unha das principais zonas de ocio do concello.}

^{En concreto, as actuacións céntranse no parque de xogos infantís, coa retirada da area que cubría o chan da zona na que se atopan a tirolina e os aparellos de calistenia. “É area vella e está mesturada con herbas e terra”, explica o docente da especialidade, José Manuel Picallo. “Estamos eliminándoa ata chegar ao solo vexetal, onde instalaremos unha malla antiherba para que non rebrote a vexetación. Despois faremos un recheo, deixando os bordos máis elevados para que a area non invada o paseo”, engade.}

^{Ademais desta obra, os aprendices de forestais continuaron nas últimas semanas cos traballos en zonas verdes, xardíns e espazos naturais de Valga, coma a área fluvial de Vilarello e os exteriores do pavillón de Baño. “Priorizamos a poda porque, con estes cambios de tempo que se están a producir, as árbores xa empezan a brotar", indica Picallo. Por exemplo, en Baño realizaron unha actuación de mantemento xeral. Podaron os abetos e loureiros a un terzo de ramaxe dándolle unha forma ornamental, tamén actuaron sobre os cactos e rafias e retiraron as hedras dos troncos de varias árbores “para evitar que as asfixiaran”.}

^{Todos os restos vexetais foron despois triturados e empregaranse como material estruturante nos composteiros municipais, evitando así a súa queima e os prexuízos medioambientais que esta produce.}  

^{O Obradoiro de Emprego Xóvenes II, no que participan dezaseis mozos de Valga e Moraña, foi posto en marcha por estes dous concellos en outubro do pasado ano, cunha subvención da Xunta de Galicia. Está cofinanciado pola Unión Europea mediante o programa FSE+Galicia 2021-2027.}