- O alcalde e a concelleira de Emprego asistiron esta mañá ao acto de inauguración

- “Actitude, responsabilidade e disciplina” foi o que lle pediu Bello Maneiro ao alumnado

^{Valga, 28 de novembro de 2023.}

^{O Obradoiro de Emprego Ulla-Umia, promovido polos concellos de Moraña e Valga, chega á súa sétima edición, que esta mañá foi inaugurada polo delegado da Xunta en Pontevedra, Agustín Reguera, acompañado polos alcaldes de ambos municipios, José María Bello Maneiro e Sito Gómez. Asistiron tamén a concelleira de Formación e Emprego, Carmen Gómez, e o xefe territorial de Promoción do Emprego, José Antonio Rodríguez.}

^{Vinte persoas desempregadas participan neste proxecto, no que recibirán durante un ano formación nas especialidades de carpintería e forestais. As clases teóricas compaxinaranas coa realización de obras de utilidade pública en infraestruturas públicas e espazos verdes e de lecer. Durante todo este tempo, ademais, percibirán o salario mínimo interprofesional.}

^{As tres administracións implicadas no proxecto realizarán un investimento de máis de 550.000 euros, dos que arredor de 530.000 son aportados pola Xunta de Galicia.}

^{Na súa intervención, Bello Maneiro instou ao alumnado a que aproveiten a formación que van a recibir. “O esforzo económico que estamos a facer é por vós, para que persoas que tendes máis dificultades para acceder a un posto de traballo aprendades unha profesión que despois vos abra portas a nivel laboral”. Por iso lles pediu “actitude, responsabilidade e disciplina”. Ademais, agradeceu á Xunta a aposta que fai por Valga e Moraña, onde van a coincidir nos próximos meses dous obradoiros de emprego (Ulla-Umia VII e Xóvenes II) cun investimento de un millón de euros.}

^{O delegado da Xunta sinalou, pola súa parte, que “a formación é a mellor política social que se pode facer”.}