- Os usuarios realizaron un mural que reflexa os diferentes ciclos da vida das mulleres

- Tamén realizaron unha homenaxe á música feminina galega a través de figuras coma Ana Kiro, Susana Seivane ou Tanxugueiras

^{Valga, 9 de marzo de 2023.}

^{As actividades conmemorativas do Día Internacional da Muller continúan en Valga, desta volta da man do CODI e dos seus usuarios que están a realizar diversas actividades sobre igualdade. Unha delas consistiu na elaboración dun mural nunha das paredes interiores do centro no que se reflexan os diferentes ciclos da vida dunha muller.}

^{Antes de iniciar o pintado, cada un dos participantes expresou as que, pensaban, son as características máis significativas de cada etapa, dende a nenez –onde a maioría coincidiron en que se trata dunha fase de experimentación, tenrura e coidados– ata a terceira idade, na que os nosos maiores transmiten sabedoría e serenidade. Todas estas etapas van unidas cunha alegación a prol da sororidade, como clave para conseguir a necesaria unión entre mulleres na loita contra o sexismo e as súas consecuencias sociais.}

^{Outro dos proxectos desenvolvidos polo CODI con motivo do 8-M foi unha homenaxe á música feminina galega, poñendo en valor a algunhas das mulleres músicas que traballan ou traballaron a prol da nosa cultura: Ana Kiro, Mercedes Peón, Susana Seivane, Tanxugueiras, Malvela, Pili Pampín ou Uxía, entre outras moitas.}

^{Os usuarios buscaron información sobre estas artistas e grupos e escribiron en cartolinas os seus nomes e o xénero musical que representan. Ademais, colaboraron na elaboración de figuras de barro con algúns dos instrumentos musicais que estas mulleres empregan sobre o escenario.}

^{A programación do 8 de marzo continúa mañá venres, coa sesión “Contos en lila”, a cargo de Cris de Caldas. A actividade, dirixida a público familiar, terá lugar no Auditorio Municipal a partir das 17:30 horas con entrada de balde.}