Accessibility Tools

NOVAS DO CONCELLO

- A actividade enmarcouse no programa “Vexo, veo Xacobeo”, co que a Xunta promove o coñecemento do patrimonio galego

- Os rapaces aproveitaron o percorrido polo fermoso tramo do Monte Albor para recoller lixo

CRACamiño1

Valga, 19 de maio de 2022.

O alumnado e profesorado do CRA de Valga viviron esta mañá unha xornada educativa diferente co Camiño de Santiago como protagonista. Os rapaces das escolas de Campaña, Forno, Ferreirós, Vilarello Xanza e Chenlo percorreron un dos tramos do Camiño Portugués ao seu paso por Valga, con saída dende o albergue de peregrinos de O Pino.

A andaina transcorreu en boa parte polo Monte Albor, un fermoso tramo no que o río Valga exerce de acompañante, ata a área de descanso de Chenlo, onde os nenos aproveitaron para facer unha parada e repoñer forzas cunha merenda. Seguiron despois ata San Miguel, onde visitaron a igrexa neoclásica, para baixar despois ata o parque Irmáns Dios Mosquera, punto final da súa ruta e onde os rapaces gozaron dun tempo de ocio.

Os pequenos peregrinos foron equipados con suadoiros, gorras e chalecos reflectores e, ademais, provistos das súas propias credenciais para ir selando a medida que avanzaban na ruta. Tamén aproveitaron o percorrido para recoller o lixo que foron atopando: plásticos, papeis ou latas, entre outros residuos.

A actividade enmarcouse no programa “Vexo, veo Xacobeo”, co que a Xunta de Galicia trata de achegar aos máis cativos os valores dos Camiños de Santiago e de divulgar e promocionar as distintas rutas a Compostela e seu patrimonio.

Este é o segundo ano que o CRA de Valga realiza este percorrido, que no pasado curso se incluíu dentro do proxecto académico “Valga no Camiño”. As accións arredor do Camiño de Santiago e do Ano Santo 2021-2022 completaranse no mes de xuño cun achegamento a outra das rutas que discorre por Valga: a marítimo-fluvial, facendo o remonte do Ulla en catamarán.

CRACamiño2 CRACamiño3

CRACamiño4 CRACamiño5

boton facebookboton twitter   boton youtube

boton cita previa sede

boton extensions

boton sede electronica

boton bandos

boton rueiro

boton tempo

boton obradoiro

Volver