Accessibility Tools

NOVAS DO CONCELLO

- Zonas de baño, de xogos, deportiva e de aloxamento conviven no espazo da antiga explotación mineira

- “É un proxecto de futuro para Valga”, destacou o Bello Maneiro, “para que os turistas veñan, queden e consuman”

ProxectoPortoPineiro1

Valga, 4 de marzo de 2022.

O alcalde, José María Bello Maneiro, e a directora xeral de Planificación Enerxética e Recursos Naturais da Xunta, Paula Uría, presentaron esta mañá o proxecto para a posta en valor como área de lecer da antiga mina de extracción de arxila Porto Piñeiro, situada entre os lugares de A Torre (Campaña), O Carballiño (Xanza) e O Forno (Cordeiro).

O acto tivo lugar na propia mina e contou coa participación de Germán Camino e Jesús Martínez, arquitecto e enxeñeiro redactores do proxecto, financiado a través dun convenio de colaboración entre o Concello e a Consellería de Economía, Empresa e Innovación, que aportou 42.500 euros.

A mina Porto Piñeiro, situada a escasa distancia da Mina Mercedes, era un dos puntos de extracción de arxila vencellados á actividade industrial da empresa de produtos cerámicos Novo y Sierra, desaparecida en 2009. A antiga explotación mineira é actualmente unha lagoa de 5’32 hectáreas formada a partir da acumulación de augas sobre o leito impermeable de arxilas compactadas. En total, todo o ámbito sobre o que se pretende actuar supera os 100.000 metros cadrados.

O obxectivo do proxecto é promover un proceso de renaturalización similar ao que se levou a cabo na Mina Mercedes, incorporando as ribeiras da lagoa e a súa lámina de auga coma espazo público activo para o goce dos veciños e completando a transformación dunha mina a ceo aberto nun espazo de grande calidade ambiental e social.

Para acadalo, o proxecto recolle actuacións coma o acondicionamento dunha zona de baño ao aire libre cunha praia artificial e unha piscina; unha área de usos recreativos e de ocio, con xogos de area e auga, un parque infantil e tamén equipamento para mozos máis maiores; unha zona deportiva, para a que se proxectan unha pista para a práctica de BMX e Skate, un complexo de fitness outdoor e un percorrido de equilibrio Parkour, así coma equipamento ciclista (aparcamento e marquesiña para bicicletas e unha estación de mantemento e lavado). Tamén está prevista unha cávea natural no bordo da lagoa cun escenario flotante, e unha zona de aloxamento con cabanas tanto en terra coma sobre a lámina de auga. O orzamento total do proxecto supera os 14 millóns.

O alcalde sinalou que se trata “dunha iniciativa de futuro para Valga, que está relacionado con outras actuacións xa executadas ou proxectadas e vencelladas todas ao patrimonio industrial e mineiro da antiga empresa Novo y Sierra: o acondicionamento da Mina Mercedes, que agora está previsto dotar dun parque infantil; a recuperación do porto de carga e descarga que existía no río Ulla, punto no que se acaba de instalar un novo pantalán; e a rehabilitación da liña de vagonetas aéreas na que se transportaban os produtos cerámicos e as materias primas para fabricalos.

O obxectivo é que “os turistas veñan a Valga, queden e consuman no municipio, e a iso axudará esta zona de lecer impresionante que hoxe presentamos”. O rexedor apuntou que a primeira actuación que se executará como parte deste proxecto será unha senda ciclable e peonil que discorrerá pola contorna da antiga barreira. Investiranse 500.915 euros, dos que 425.778 son subvencionados pola Deputación a través do programa ReacPon e o Concello aportará 75.137.

Ademais da construción da senda con base de grava, solo de cemento e bordo de formigón, as obras inclúen a restauración ambiental da zona. Aplicaranse tratamentos silvícolas, con limpezas e rozas selectivas para unha posterior revexetación. Recuperaranse a canle e a ribeira do rego do Regueiro, coa eliminación de especies invasoras e a plantación de árbores autóctonas coma salgueiros, freixos, carballos, castiñeiros ou bidueiros. Tamén se intervirá na ribeira oeste da lagoa, adecuando os perfís do terreo para un mellor acceso e implantando unha comunidade vexetal de ribeira.

A directora xeral Paula Uría apuntou que este proxecto promovido polo Concello é “un exemplo das posibilidades de rehabilitación que ofrecen os antigos espazos mineiros para uso e desfrute dos cidadáns e turistas. É un proxecto impresionante que abre moitísimas oportunidades dende o punto de vista turístico tanto para Valga coma para Galicia". A representante da Xunta amosouse confiada en que "actuacións coma esta poidan acceder os fondos europeos Next Generation, para s que o goberno central habilitou axudas para a rehabilitación de espazos mineiros".

ProxectoPortoPineiro2 ProxectoPortoPineiro3

ProxectoPortoPineiro4

PORTOPIÑEIRO1

PORTOPIÑEIRO2

PORTOPIÑEIRO3

boton facebookboton twitter   boton youtube

boton cita previa sede

boton extensions

boton sede electronica

boton bandos

boton rueiro

boton tempo

boton obradoiro

Volver