- Os estudantes de ESO participaron nun concurso de cantigas que eles mesmos compuxeron

- As clases de 3ºA e 3ºB gañaron os dous premios que estaban en xogo: unha xornada no kartódromo e un vale para a cafetería do instituto

^{Valga, 4 de maio de 2021.}

^{O alumnado e profesorado do IES de Valga celebraron onte a Festa dos Maios no patio exterior do recinto educativo.}

^{Os estudantes dos catro cursos de Educación Secundaria foron os protagonistas desta celebración propia da tradición folclórica galega, coa que se festexa a entrada da primavera. Pola mañá elaboraron un maio tradicional, adornado con flores, follas e ovos, e pola tarde participaron nun concurso de cantigas.}

^{As diferentes clases cantaron as coplas satíricas que compuxeran nas xornadas anteriores, nalgúns casos acompañados tamén de música de percusión, pandeiretas ou piano. A pandemia, a actividade do instituto ou a actualidade foron algúns dos temas que centraron as súas críticas.}

^{Un xurado formado por un representante da ANPA “A Bella Otero”, outro do profesorado e unha alumna de Bacharelato valorou as diferentes actuacións para outorgar os dous premios que estaban en xogo: un vale para o kartódromo (agasallo da ANPA) e un vale para a cafetería do IES.}

^{Os gañadores do primeiro premio foron os rapaces de 3ºA e o segundo premio recaeu en 3ºB.}