Accessibility Tools

NOVAS DO CONCELLO

- O proxecto deseñado polo Concello recolle actuacións de pavimentación, nova iluminación e melloras no saneamento

- Tamén inclúe a posta en valor dun lavadoiro tradicional e a construción de escaleiras de acceso dende a N-550

ObrasRúaBaixa1

Valga, 19 de outubro de 2020.

A empresa construtora Narom S.L. deu comezo nos últimos días ás obras de reurbanización da Rúa Baixa e do entorno do Centro de Interpretación da Caña do País, unha actuación deseñada polo Concello e para a que o goberno local xestionou unha aportación de 175.000 euros por parte do Ministerio de Transportes, Mobilidade e Axenda Urbana. O proxecto recolle obras como a pavimentación, a mellora dos servizos de saneamento, recollida de augas e iluminación e o acondicionamento do lavadoiro existente na zona, entre outras.

A Rúa Baixa, que arranca na estrada N-550 e chega ata a ribeira do río Valga, ten un carácter singular, xa que comeza como unha rúa urbana e, no seu devir, transfórmase en sendeiro. A paisaxe vai cambiando ao seu carón, de construída a entorno natural. Hai que destacar, porén, que se trata dunha rúa que acolle varios fitos dentro do seu percorrido, comezando pola Casa do Concello e seguindo polo Museo da Historia, o Centro de Interpretación da Caña do País e un lavadoiro tradicional ata desembocar no Parque Irmáns Dios Mosquera.

As obras que se levarán a cabo no marco deste proxecto inclúen a pavimentación da rúa combinando formigón e granito do país en pezas de grande formato. A pedra colocarase nas zonas máis nobres para poñer en valor os puntos salientables do percorrido, coma nas entradas dos edificios e nos accesos ao Museo da Historia e á Praza do Concello. Tamén se levarán a cabo melloras no saneamento e na recollida de augas pluviais.

Para mellorar o acceso ao Centro de Interpretación da Caña habilitarase un camiño formado por pezas de formigón con formatos variables. No exterior do edificio crearase unha zona axardinada e incorporarase mobiliario urbano.

A intervención para a posta en valor do lavadoiro consistirá no pavimentado do entorno con lousas de granito e a colocación de bancos e luminarias, para a valorización tanto da pía coma do espazo adxacente á mesma. A edificación existente sobre o lavadoiro revestirase con entaboado vertical de madeira, buscando a súa mellor integración na paisaxe.

A carón deste elemento patrimonial proxéctase un pequeno aparcadoiro executado con terra estabilizada. Ademais, melloraranse os accesos dende a estrada N-550 coa construción de dúas escaleiras aproveitando o talude existente.

As actuacións neste entorno afectarán tamén á iluminación, coa dotación de equipos de alta eficiencia enerxética mediante o uso de lámpadas LED, que permitirán reducir os custos de mantemento.

            ObrasRúaBaixa2                 ObrasRúaBaixa3

ObrasRúaBaixa4

boton facebookboton twitter   boton youtube

boton cita previa sede

boton extensions

boton sede electronica

boton bandos

boton rueiro

boton tempo

boton obradoiro

Volver