Accessibility Tools

NOVAS DO CONCELLO

- O Concello tramita dous novos obradoiros de emprego, un para mozos e outro para adultos

- O plan provincial Revitaliza achegará a compostaxe e o tratamento de residuos orgánicos á veciñanza

Plenoextra Outubro19

Valga, 21 de febreiro de 2020.

O Pleno aprobou onte, na primeira sesión ordinaria do ano 2020, os proxectos de recuperación da antiga liña de vagonetas de transporte de arxila entre a Mina Mercedes e o Ulla e de creación dun embarcadoiro neste mesmo río. Trátase de dous proxectos complementarios e que teñen como obxectivo dar un pulo ao potencial turístico do municipio.

O proxecto das vagonetas aéreas está valorado en 3.995.525’60 euros e inclúe a construción do teleférico entre o río Ulla e a Mina Mercedes, cunha lonxitude aproximada de 1.100 metros, a urbanización das áreas próximas e a recuperación dos restos que se conservan da antiga liña de transporte de arxila, para os que se está tramitando a declaración como Ben de Interese Cultural (BIC).

En canto ao embarcadoiro, o proxecto conta cun orzamento de 332.439’27 euros que será financiado integramente pola Xunta, a través da entidade Portos de Galicia. A nova infraestrutura contará cunha pasarela de 33 metros de lonxitude e 2’5 de ancho realizada en estrutura de aluminio. Desde esta accederase ao pantalán, unha plataforma flotante tamén de aluminio e que terá 24 metros de longo por 3 de ancho. Destinarase ao atraque aos catamaráns e embarcacións turísticas que operan na Ría de Arousa e no río Ulla para atraer, así, un fluxo de visitantes que cheguen ao municipio por vía fluvial.

Os dous proxectos foron aprobados cos votos favorables do grupo de goberno e a abstención de PSOE e En Marea.

Tamén en clave turística, o Pleno acordou, por unanimidade, solicitar á Secretaría de Estado de Turismo do Ministerio de Industria, Comercio e Turismo a declaración de Interese Turístico Nacional para o Belén Artesanal en Movemento. A memoria, que tamén se aprobou na sesión de onte, destaca que a afluencia de visitantes durante o último Nadal aproximouse aos 50.000 e que cada vez son máis as persoas procedentes de todas as comunidades de España e incluso do estranxeiro as que se achegan a Valga atraídos polo Belén. A composición xa está declarada dende 2013 de Interese Turístico de Galicia.

A orde do día incluíu tamén a solicitude á Caixa de Anticipos da Deputación de 74.736’43 euros para a adhesión do Concello de Valga ao plan provincial “Revitaliza”, para fomentar a compostaxe e mellorar o tratamento de residuos orgánicos. Este punto aprobouse cos votos a favor do goberno e a abstención da oposición.

Por outra parte, aprobáronse por unanimidade os proxectos de dous novos Obradoiros de Emprego que se solicitarán á Xunta conxuntamente co Concello de Moraña para favorecer a inserción laboral de persoas desempregadas. Un deles diríxese a mozos e o outro a adultos e, entre os dous, superan os 400.000 euros de orzamento.

Por último, o Concello de Valga adheriuse ao Pacto dos alcaldes para o clima e a enerxía, unha iniciativa da Comisión Europea fronte ao cambio climático e para a aplicación de boas prácticas en ámbitos coma a mellora da eficiencia enerxética ou a redución das emisións de CO2. Este punto contou tamén coa unanimidade de todos os grupos da Corporación.

No Pleno tomou posesión Marcos Magán Iglesias como concelleiro do grupo socialista.

boton facebookboton twitter   boton youtube

boton cita previa sede

boton extensions

boton sede electronica

boton bandos

boton rueiro

boton tempo

boton obradoiro

Volver