- O nacemento aínda pode ser visitado por grupos organizados ata o mes de setembro, concertando cita no número de teléfono 630 95 25 15

- Pablo Castromán Sánchez, veciño de Valga, foi o gañador do concurso para localizar ao personaxe que se agochaba no Belén, Nicolás Maduro

^{Valga, 15 de xaneiro de 2018.}

^{O Belén Artesanal en Movemento, obra da asociación Amigos do Belén, consolídase como o principal recurso turístico de Valga logo de recibir nas últimas seis semanas a unhas 42.000 persoas. Na fin de semana de clausura contabilizáronse arredor de 3.000 visitantes, parte deles chegados a Campaña en cinco excursións organizadas.}

^{Nas dúas primeiras semanas de apertura foron máis de 15.000 as persoas que elixiron o Belén de Valga como alternativa de ocio, concentrándose as visitas nas fins de semana e nos festivos da ponte da Constitución. As xornadas de más alfuencia foron o domingo inaugural, con 1.200 visitantes, o 6 e o 8 de decembro, que sumaron entre os dous 3.500 persoas, e o día 17, no que se bateu o récord de afluencia nunha soa xornada con 3.000 visitantes.}

^{A medida que se achegaban as festas de Nadal, as visitas repartíronse máis entre semana, tendo en conta que os días de Noiteboa e Fin de Ano coincidiron en domingo e ao estar, ademais, os nenos de vacacións escolares. Dende comezos de ano e ata onte, día da clausura, as xornadas de máis concurrencia de xente foron o 5 de xaneiro, ao celebrarse a cabalgata nos exteriores do Belén Artesanal, e a propia fin de semana de Reis, con dous festivos, así como os días previos ao peche.}

^{Durante estas seis semanas, o Belén recibiu ademais polas mañás a unha trintena de excursións, a maioría de centros educativos, pero tamén doutras asociacións e entidades como Centros de Día. A partir de agora e ata o mes de setembro, o nacemento poderá ser visitado por grupos organizados que deben concertar cita con anterioridade no número de teléfono 630 95 25 15.}

^{Na tarde de onte, unha vez pechadas as portas, celebrouse o sorteo do concurso para descubrir que personaxe famoso se agochaba entre as 4.500 figuras do Belén. Era Nicolás Maduro e o gañador foi o valgués Pablo Castromán Sánchez, que recibirá como premio a figuriña do nacemento que el elixa, entre as que non teñen movemento.}

^{Viaxe da asociación Amigos do Belén}

^{Como é habitual, unha vez rematado o prazo de apertura ao público do Belén Artesanal, a asociación Amigos do Belén organiza unha excursión para visitar algúns dos nacementos de máis sona da Península. Nesta ocasión o destino será Portugal, un país con gran tradición belenista.}

^{Vinte e cinco integrantes da asociación partirán o venres 19 de Valga con destino a Porto. Durante a fin de semana desprazaranse a Coimbra, onde visitarán o Belén de San Antonio dos Olivais, e tamén a Braga, para coñecer os nacementos dos museos de Pío XII e de Arte Antigo e tamén o Belén de Priscos, que está considerado o belén vivente máis grande de Europa.}