- O instituto adquiriu dez computadores portátiles que os estudantes poderán utilizar para a realización de traballos escolares

- O centro estrea o vindeiro xoves, día 6, outra iniciativa cultural: o Cine Fórum, coa proxección de “Zorba, el griego”

^{Valga, 30 de xaneiro de 2020.}

^{O IES de Valga acaba de habilitar un servizo de préstamo de ordenadores para o alumnado, co obxectivo de facilitar o seu acceso ás novas tecnoloxías.}

^{O instituto adquiriu recentemente dez computadores portátiles coa finalidade de emprestalos aos estudantes que os precisen para a realización de traballos escolares.}

^{A directora do IES, Dolores Rego Balsa, considera que “resulta un tanto anacrónica unha aprendizaxe que non inclúa de forma activa a procura de información en Internet e a presentación de traballos en soporte electrónico, ao igual que xa son poucas as actividades profesionais que se poidan desenvolver con normalidade prescindindo das novas tecnoloxías”.}

^{Cada alumno que teña interese no préstamo dun destes ordenadores poderá levar o equipo á súa casa durante dous días, renovables no caso de non existir máis demanda nese período. En caso de que o programa funcione satisfactoriamente, o instituto non descarta incluso a adquisición de máis equipos, sempre “na medida das posibilidades do centro e se a demanda o xustifica”, explica a directora.}

^{Cine Fórum, a próxima semana}

^{Por outra parte, o IES estrea a vindeira semana outro dos seus novos proxectos culturais: o Cine Fórum. A sesión inaugural terá lugar o xoves 6 de febreiro a partir das 16:30 horas na biblioteca do centro.}

^{Proxectarase o clásico “Zorba, el griego” (1964) unha película recomendada para todos os públicos que foi dirixida por Michael Cacoyannis. O reparto está encabezado por Anthony Quinn, que interpreta ao protagonista nun dos papeis que marcaron a súa carreira cinematográfica.}

^{Nesta comedia dramática un mozo escritor inglés viaxa a Creta para tomar posesión dunha pequena propiedade que herdou. Na viaxe coñece a Zorba, un home de carácter vitalista e de costumes primitivas, que exerce sobre el unha gran influencia. A historia relata a relación que xorde entre estes dous personaxes, que representan o conflito humano entre a paixón e razón.}

^{A asistencia está aberta a toda a comunidade educativa e tamén a todos os veciños interesados na cultura e, en particular, no cine.}