- Das dezanove comisións que se presentaron ao certame son finalmente dezaseis ass que optan aos premios

- Os gañadores daranse a coñecer o vindeiro sábado durante a XXIX Festa da Anguía e Mostra da Caña do País

^{Valga, 24 de agosto de 2019.}

^{O xurado do concurso “Embelecer Valga” percorreu o esta mañá os lugares acondicionados polos veciños para elixir, de entre todos, ao lugar máis fermoso. Das dezanove comisións veciñais que presentaron os seus proxectos de mellora de espazos e infraestruturas públicas son, finalmente, dezaseis as que optan aos premios. As tres obras restantes non puideron ser visitadas polo xurado xa que non se chegaron a executar.}

^{Os lugares que optan aos premios son os colexios de Baño e Cordeiro, Avenida da Coruña, Barcia, Barro, Beiro, Canle, Casaldeirigo, Cernadas, Cerneira, Cimadevila, Eiras, Gándara, Laceiras, Vilar e Vilarello. O xurado estivo formado polos concelleiros Pedro Calvo, Malena Isorna e José Ángel Souto, ademais dun representante de cada comisión veciñal participante. Os tres proxectos más valorados recibirán trofeo, diploma e 300, 200 e 100 euros. Os demais grupos presentados ao certame recibirán un diploma e unha gratificación de 100 euros. Os gañadores daranse a coñecer o vindeiro sábado no trancurso da XXIX Festa da Anguía e Mostra da Caña do País.}

^{O concurso “Embelecer Valga” premia ao lugar máis fermoso acondicionado e engalanado pola cidadanía, de maneira que se implique á veciñanza no coidado e arranxo dos espazos públicos da vila, acometendo de forma voluntaria e gratuíta accións consistentes na limpeza, mellora, dotación de equipamentos ou ornamentación de paraxes. Os participantes tiveron que formar unha comisión veciñal e presentar no Concello unha pequena memoria descritiva das accións de mellora a desenvolver e os materiais que estimaban precisos, ademais dunha reportaxe fotográfica do estado no que se atopaba o lugar no que se levaron a cabo as actuacións. A administración local facilitoulles os medios precisos para a execución dos proxectos e puxo á súa disposición os materiais necesarios para o desenvolvemento das obras.}

^{Os proxectos que o sábado visitou o xurado foron:}

     ^{1. ANPA e CEIP Plurilingue Baño-Xanza: acondicionamento de xardíns, pistas e peche do colexio.}

     ^{2. ANPA e CEP Plurilingüe Ferro Couselo: acondicionamento do xardín do colexio.}

     ^{3. Avenida da Coruña: instalación de barbacoa e mellora do parque.}

     ^{4. Barcia: renovación da casiña do parque e acondicionamento do entorno.}

     ^{5. Barro: limpeza xeral e reposición de plantas no parque.}

     ^{6. Beiro: acondicionamento e renovación do parque.}

     ^{7. Canle: mellora do parque e da piscina e instalación dunha casiña de xogos.}

     ^{8. Casaldeirigo: acondicionamento do lavadoiro.}

     ^{9. Cernadas: Acondicionamento do lavadoiro.}

    ^{10. Cerneira (A Fonte): cancha de baloncesto, varanda e acondicionamento do entorno.}

    ^{11. Cimadevila e Souto: Mellora do parque infantil e acondicionamento do lavadoiro.}

    ^{12. Eiras: reparación do lavadoiro da aldea (tellado, varanda, e chan) e adecentamento do entorno.}

    ^{13. Gándara: cambio de fonte de pedra, novas plantas e pintado.}

    ^{14. Laceiras: acondicionamento do parque, substitución de columpios e plantas.}

    ^{15. Vilar: acondicionamento xeral: bancos, papeleiras, prantas…}

    ^{16. Vilarello: acondicionamento e arranxo do parque, do lavadoiro e outras instalacións.}