- O taller Ulla-Umia III clausurouse esta mañá logo de nove meses de sesións teóricas e realización de obras públicas

- En Valga os aprendices executaron traballos no edificio administrativo, no pavillón de Beiro e no ximnasio, nas áreas de lecer e no Camiño Portugués

^{Valga, 9 de agosto de 2019.}

^{O alcalde, José María Bello Maneiro, e a concelleira de Formación e Emprego, Carmen Gómez, participaron esta mañá no acto de clausura do Obradoiro de Emprego Ulla-Umia III, que tivo lugar no Auditorio Municipal. Asisitiron, tamén, a alcaldesa de Moraña, Luisa Piñeiro, a secretaria territorial da Xunta en Pontevedra, Ana Ortiz, a directora do obradoiro, Mª Carmen Vidal, o persoal administrativo e docente e o alumnado.}

^{O Obradoiro de Emprego Ulla-Umia III, promovido polos concellos de Valga e Moraña, tivo unha duración de nove meses durante os que vinte persoas desempregadas recibiron formación teórica e práctica nas especialidades de albanelería e forestais, percibindo o salario mínimo interprofesional. O obxectivo foi o de favorecer a inserción laboral dos participantes –un deles xa está traballando–, para o que se contou cun orzamento total de 348.807 euros, dos que case 290.000 foron aportados pola Xunta e a parte restante polos dous concellos.}

^{Ademais da formación, os aprendices traballaron na realización de obras públicas. En Valga executaron traballos de rehabilitación no edificio de usos administrativos, acometeron melloras nos vestiarios do pavillón de Beiro e no ximnasio municipal, e realizaron tarefas de acondicionamento, mantemento e plantacións no miradoiro de Beiro, na área fluvial de Vilarello e no Camiño Portugués. “A partir de agora, cando pasedes por algunha destas obras sentirédesvos orgullosos”, díxolle o alcalde ao alumnado.}

^{Bello Maneiro fixo un balance positivo do proxecto. “Os participantes aproveitaron moi ben esta oportunidade de formarse, que vai a axudarlles no seu futuro laboral, e ao mesmo tempo realizaron obras importantes”. O rexedor e a súa homóloga de Moraña anunciaron que os dous concellos xa teñen solicitado ante a Consellería de Economía, Emprego e Industria un novo Obradoiro de Emprego para vinte desempregados e, de novo, coas especialidades de albanelería e forestais.}

^{“Estou convencida de que haberá un novo obradoiro nestes concellos”, afirmou a secretaria territorial da Xunta, que destacou a importancia deste tipo de proxectos para a formación e cualificación dos participantes e tamén para a mellora do patrimonio nos concellos promotores. Ana Ortiz calculou que a Xunta ten invertido nos últimos tres anos máis de 750.000 euros nos obradoiros de emprego de Valga e Moraña, nos que se formaron un total de 60 persoas.}