- A comunidade educativa e outros veciños sumáronse a esta acción benéfica

- Houbo sorteos, obradoiros e visitas dalgúns dos personaxes de debuxos favoritos dos máis cativos

^{Valga, 10 de xaneiro de 2019.}

^{A Escola Infantil Municipal de Valga recadou 676’09 euros para a Fundación Aladina, que axuda a nenos enfermos de cancro e ás súas familias, cun festival solidario que tivo lugar onte pola tarde no Auditorio Municipal. Os fondos reuníronse coas entradas, que custaban 3 euros por persoa, coa venda de rifas e cun mercadiño benéfico que nas xornadas previas ao evento se instalou na escola infantil.}

^{O festival congregou a alumnado, familias e persoal docente da escola e outros veciños de Valga que quixeron colaborar con esta causa. Houbo actuacións musicais, obradoiros de globoflexia e maquillaxe, sorteos de moitos agasallos donados por establecementos e casas comerciais de Valga e da súa contorna, unha merenda con pizzas e chocolate con churros e visitas dalgúns dos personaxes de debuxos animados favoritos dos máis cativos, como Peppa Pig, os Minion ou Chase da Patrulla Canina.}

^{Todos os cartos recadados destinaranse á Fundación Aladina, unha entidade sen ánimo de lucro que proporciona apoio integral a nenos e adolescentes enfermos de cancro e ás súas familias. Ofrécelles asistencia psicolóxica, emocional e material gratuíta para conseguir que recuperen as gañas de loitar contra a enfermidade.}

^{Aladina cumpre neste 2019 catorce anos de traxectoria. Cada ano atende a máis de 1.500 nenos e familias de toda España Desenvolve programas de acompañamento emocional e lúdico, de exercicio físico, terapias lúdicas e coidados paliativos, entre outros. Ademais, a fundación ten financiado obras en hospitais públicos. En 2016 inaugurou unha UCI infantil no Hospital Niño Jesús de Madrid cun investimento de 1,5 millóns de euros.}