- Os participantes no certame deben levar os seus deseños ao Auditorio entre os días 31 de outubro e 2 de novembro

- Os gañadores coñeceranse o día 3, coincidindo coa festa de disfraces

^{Valga, 16 de outubro de 2023.}

^{O Concello promove varias actividades con motivo do Samaín, unha celebración coa que os celtas conmemoraban a chegada do inverno na noite do 31 de outubro na que, ademais, se cría que as almas dos defuntos regresaban ao mundo dos vivos.}

^{Para festexar esta data, as bibliotecas municipais e as concellerías de Cultura e Educación organizan un concurso de cabazas decoradas con temática libre. Estas exporanse no Auditorio Municipal, onde teñen que depositalas os participantes entre os días 31 de outubro e 2 de novembro. Acompañaranse cun sobre que, polo exterior, teña escrito o nome da cabaza. No interior deben introducirse os datos persoais do autor (nome e apelidos, enderezo e teléfono de contacto).}

^{A resolución do concurso terá lugar o día 3, con agasallos para os autores das tres mellores cabazas. Valoraranse a orixinalidade, os materiais empregados e calquera outro detalle que resalte no deseño. A proclamación dos gañadores coincidirá coa festa de Samaín que terá lugar a partir das 17:00 horas no Auditorio, na que poden participar nenos e adultos cos seus disfraces. Haberá chocolatada gratis para todos.}