UNHA CROQUETA DECONSTRUÍDA TRUNFA NUNHA NOVA EDICIÓN DO CONCURSO DE RECEITAS “ANGUÍA CHEF”

- O certame contou con seis participantes, que presentaron o peixe ao forno, guisado, rebozado, sobre tostas e en coca

- Este domingo continúan as actividades do Agosto Gastronómico, cunha sesión de coctelería

^{Valga,  19 de agosto de 2026.}

^{A veciña de Carreiras (Pontecesures), Sonia Carbia Torres alzouse co primeiro premio do certame "Anguía Chef", celebrado onte no marco do Agosto Gastronómico. A súa proposta, unha "Croqueta desestruturada de anguía", conquistou ao xurado grazas á súa orixinalidade, ao bo tratamento do produto e ao sabor.}

^{A receita gañadora arrédase das preparacións máis tradicionais da anguía separando os elementos clásicos dunha croqueta para xogar coas texturas. A campioa elaborou a base sofritindo pequenos tacos de anguía con cebola e allo e flamexándoos con caña tostada. Por outra banda, preparou unha bechamel con manteiga, fariña e leite e enriqueceuna con queixo San Simón afumado. Para a presentación, serviu no fondo dous culleróns do sofrito, cubertos pola bechamel e coroados con cebola frita.}

^{O xurado, que tivo ao chef Álex Iglesias á fronte, tívoo complicado xa que inicialmente produciuse un triplo empate con outras dúas receitas: a "Anguía crocante do Ulla" do valgués Pablo Quintáns, na que o peixe rebozado se acompañaba de humus e salsa de quixo Arzúa-Ulloa; e a "Anguía ao forno" de gañador do ano pasado, Jorge Riveiro. Neste caso, a anguía macerada con caña tostada e cociñada ao forno, presentouse con cachelos..}

^{En total foron seis os participantes desta edición do "Anguía Chef". As outras tres propostas foron "Entremeses variados de anguía", de José Andrés Freiría Castro; "Anguía guisada con pan ao azafrán", de Carmen García Costa; e "A coca da avoa Pilar", de Rmedios Couselo Rico.}

^{O xurado destacou que "houbo moita calidade, con pratos moi elaborados o que dificultou o veredito final". A decisión final baseouse "no tratamento da anguía, na presentación o e no concepto diferente" da croqueta deconstruída de Sonia Carbia.}

^{As actividades do Agosto Gastronómico continúan este domingo, ás 13:00 horas, cun novo showcooking no que Álex Iglesias preparará catro combinados de autor empregando caña do país nas súas distintas variedades.}