O CENTRO SUPERIOR DE MÚSICA GRADÚA A UNHA NOVA PROMOCIÓN DE ALUMNOS E CONSOLÍDASE COMO VIVEIRO MUSICAL

- O alcalde e o director xeral de Centros da Xunta participaron na posta de longo dunha talentosa xeración de músicos

- Durante a cerimonia, que tivo lugar no Auditorio, actuou a Big Band do CSM Galicia

^{Valga, 13 de xuño de 2026.}

^{O curso académico chega ao seu fin e o Centro Superior de Música tamén despide ao alumnado que remata os seus estudios musicais. Na fin de semana celebrouse o acto de graduación no Auditorio Municipal, que tivo como protagonistas a:}

• ^{Paula Vidal Lorenzo (Composición)}
• ^{Marcos Díaz Pan (Interpretación guitarra Jazz)}
• ^{Lucas Martínez Marcos (Interpretación Contrabaixo)}
• ^{Manuel García Vicente (Pedagoxía Xeral e da Música)}
• ^{Javier Cerezo Gil (Dirección)}
• ^{Alonso Pinilla Villamor (Interpretación Piano)}
• ^{Carmen Fuxing Ferrer Rivas (Interpretación Piano)}
• ^{Irene Vázquez Amarelle (Interpretación Piano)}
• ^{Ariadna Landrove Santana (Interpretación Frauta)}

^{Este grupo de alumnos puxeron o broche de ouro a unha etapa marcada polo esforzo, a aprendizaxe e, sobre todo, pola paixón pola música e, por iso, serán unha promoción que deixará pegada no centro. Os nove inician agora unha nova e prometedora andaina a nivel artístico e profesional.}

^{A cerimonia foi presentada por Manuel García e Carmen Fuxing Ferrer e estivo cargada de momentos emotivos. Os novos titulados compartiron cos asistentes lembranzas, vivencias e anécdotas do seu paso polo CSM Galicia. Tamén interviñeron os padriños da promoción: Ilona Timchenko, titora de piano, e Alfredo Susavila, xefe do Departamento de Jazz, quen dedicaron unhas palabras de alento e inspiración aos mozos de cara ao seu futuro profesional.}

^{Ademais de polas súas familias e achegados, os graduados estiveron respaldados polo alcalde, José María Bello Maneiro; o director xeral de Centros da Consellería de Educación, Jesús Álvarez Bértolo; e o director do CSM Galicia, Simón Ibáñez. Todos eles coincidiron en sinalar o talento e a dedicación do alumnado do centro, estendendo o recoñecemento ao equipo docente.}

^{Como non podía ser doutro xeito, a música tivo un papel protagonista na gala, a cargo da Big Band do CSM Galicia.}