O CONCELLO INICIARÁ OS TRÁMITES PARA SOLICITAR QUE SE DEDIQUE O DÍA DAS LETRAS GALEGAS AO PADRE ISORNA, AO CUMPRIRSE DEZ ANOS DO SEU PASAMENTO

- “Queremos que sexa o segundo valgués en recibir esta homenaxe, xa que o seu traballo en defensa da lingua galega está fóra de toda dúbida”, di o alcalde

- José Isorna, nado en Barcia, foi coñecido coma “o cura galeguista” e, en 2009, doou ao Concello a súa biblioteca privada, formada por máis de 15.000 volumes

^{Valga, 28 de abril de 2026.}

^{O Concello de Valga iniciará os trámites para solicitar, ante a Real Academia Galega, que unha das próximas edicións do Día das Letras Galegas se dedique ao Padre Isorna, toda vez que o pasado domingo se cumpriron 10 anos do seu falecemento. Esta é unha das condicións imprescindibles para que un autor poida recibir este recoñecemento, polo que o alcalde, José María Bello Maneiro, destaca que “xa non hai ningún obstáculo para que o Padre Isorna se converta no segundo valgués, despois de Xesús Ferro Couselo, en ser homenaxeado no Día das Letras Galegas. A relevancia da súa obra e o seu traballo en defensa da lingua galega están fóra de toda dúbida”.}

^{Bello Maneiro sinala que a figura do Padre Isorna transcende o ámbito literario. A súa obra xornalística foi tamén fecunda pero, principalmente, destacou no campo relixioso e espiritual. Foi coñecido coma “o cura galeguista”, pola súa condición de precursor do uso do galego na liturxia, oficiando durante máis de vinte anos as misas emitidas pola Televisión de Galicia.}

^{Nado en Barcia no ano 1921, José Manuel Isorna Ferreirós realizou o noviciado en Santiago e, despois de completar a súa formación filosófica e teolóxica, foi ordenado sacerdote en maio de 1947. Ocupou diversos cargos de relevancia dentro da Orde Franciscana, desempeñando unha intensa actividade como comunicador en prensa e televisión. Asumiu tamén a Delegación de medios de comunicación do Arzobispado de Santiago.}

^{Foi membro correspondente da Real Academia Galega e o 17 de maio de 1997 recibiu o título de Fillo Predilecto de Valga. No ano 2009, o franciscano doou ao Concello a súa biblioteca privada, integrada por uns 15.000 volumes: traballos de teoloxía e filosofía, literatura histórica, libros de poesía e arte, bibliografías, publicacións propias, enciclopedias, dicionarios, mapas e diverso material audiovisual, que pasaron a formar parte do patrimonio público valgués e que permitiron abrir en 2011 no Auditorio Municipal a primeira biblioteca pública de teoloxía de Galicia.}

^{“Está claro que o Padre Isorna mantivo durante toda a súa vida un forte compromiso con Valga, con Galicia e coa cultura e lingua galegas e cremos que o recoñecemento debe estar á altura”, conclúe o alcalde.}