- Durante esta rápida visita ao concello tamén compartiron momentos cos usuarios do CODI e do Centro de Día

- O día 5 de xaneiro regresarán para recibir a todos os cativos nos exteriores do Belén Artesanal

^{Valga, 19 de decembro de 2025.}

^{Os nenos de Valga recibiron esta mañá unha gran sorpresa: a visita dos Reis Magos, que aproveitaron o último día de colexio antes das vacacións de Nadal para saudar aos cativos e recoller as cartas nas que lles escribiron cos seus desexos. Unha longa lista de agasallos terán que preparar Melchor, Gaspar e Baltasar xa que, polo que parece, os pequenos de Valga portáronse bastante ben durante este ano.}

^{Os Magos, chegados dende Oriente, fixeron un percorrido polos diferentes centros educativos, comezando na Escola Infantil Municipal, onde os pequerrechos de 0 a 3 anos os recibiron con asombro e tamén con ledicia. Despois compartiron tamén momentos de emoción cos alumnos dos colexios Baño-Xanza e Xesús Ferro Couselo, entre os que repartiron caramelos.}

^{A todos emprazáronos a que o día 5 de xaneiro acudan aos exteriores do Belén Artesanal, onde terá lugar a recepción oficial. Alí, Melchor, Gaspar e Baltasar saudarán un a un a todos os nenos que queiran acompañalos e entregaranlles agasallos.}

^{Ademais dos rapaces, esta rápida visita dos Reis tamén tivo como protagonistas aos usuarios do Centro de Día e aos do CODI. A estes últimos puideron saudalos no Belén Artesanal a onde se desprazaron os Magos para recibir a un grupo de 250 persoas que viñeron visitar o nacemento.}