- Trinta veciños foron os primeiros en obter a súa nova documentación nesta oficina itinerante, entre eles o alcalde, que considera que este era un servizo “demandado e necesario”

- As citas para o mes de outubro están esgotadas, pero xa poden solicitarse para o 28 de novembro

^{Valga,  29 de setembro de 2025.}

^{Valga recibiu esta mañá por vez primeira á unidade móbil da Policía Nacional para a expedición e renovación do DNI e do Pasaporte, na que trinta veciños de Valga e de municipios da contorna puideron actualizar a súa documentación. Un deles foi o alcalde, José María Bello Maneiro, que acudiu a renovar o seu pasaporte e saudar aos representantes da Comisaría de Pontevedra que se desprazaron con motivo da estrea deste novo servizo. Entre eles atopábase o inspector xefe Esteban Pinilla, responsable da Unidade de Documentación da Comisaría provincial.}

^{Bello Maneiro amosouse moi ledo por poder ofrecer este servizo en Valga, evitando que os veciños teñan que desprazarse a Santiago, Pontevedra ou Vilagarcía, co que iso representa en aforro de custes e tempo. Ademais, lembrou que non só poden acudir a esta oficina móbil persoas de Valga, senón tamén residentes noutros concellos da contorna. O rexedor destacou a gran acollida por parte dos cidadáns, que en cuestión de días coparon todas as citas, o que “demostra que este era un servizo demandado e necesario”.}

^{Ademais das habituais renovacións de DNI e pasaporte, algúns dos usuarios que estaban citados nesta xornada tamén realizaron primeiras inscricións de cativos nados recentemente. En concreto, foron catro.}

^{A unidade móbil, que quedou emprazada na Praza Manuel Vicente Cousiño, regresará a Valga nos meses de outubro e novembro. Para outubro xa están esgotadas as citas e para o 28 de novembro poden solicitarse presencialmente nas oficinas do Concello ou chamando ao teléfono 986 55 94 56. O número máximo de citas por xornada é de 30.}

^{Entre os servizos que presta esta oficina atópanse: expedición de DNI e Pasaporte por primeira inscrición, perda ou subtracción; e a renovación de documentación caducada ou a piques de caducar.}

^{Tamén é posible activar o DNI electrónico, renovar certificados e cambiar as claves, trámites para os que non é necesaria cita.}

^{Os usuarios deben aportar a mesma documentación que en calquera outra oficina do DNI da Policía Nacional.}

^{Para expedición do DNI:}

• ^{Para a primeira inscrición: Unha fotografía recente (menos de dous anos) a cor e sobre fondo branco, partida de nacemento literal na que conste que se expide “só a efectos da obtención do DNI” (validez de seis meses), volante de empadroamento (validez de tres meses). Os menores de idade e persoas con discapacidade deben estar acompañados por un dos pais ou titores co DNI en vigor.}
• ^{Renovación: Unha fotografía recente (menos de dous anos) a cor e sobre fondo branco e o DNI que se quere renovar. En caso de cambio de datos, tamén se debe a portar a seguinte documentación: por cambio de domicilio, volante de empadroamento; por cambio de datos persoais, partida de nacemento literal con validez de seis meses. Os menores de idade e persoas con discapacidade deben estar acompañados por un dos pais ou titores co DNI en vigor.}

   ^{Para expedición do Pasaporte:}

• ^{DNI en vigor (se solicita a renovación/duplicado dun pasaporte vixente deberá presentar o mesmo) e unha fotografía recente (menos de dous anos) a cor e sobre fondo branco.}

^{En caso de menores ou persoas con discapacidade tamén é preciso aportar:}

          ^{-  Se non ten DNI: partida de nacemento literal na que conste que se expide “só a efectos da obtención do DNI” (validez de seis meses)-}

          ^{-  Se ten DNI deberá acreditar a relación de parentesco ou a condición de titor mediante a presentación de calquera documentación oficial (libro de familia, partida de nacemento, etc.).}

          ^{- Deben ir acompañados polos dous pais ou todos os titores cos seus DNI en vigor.}

^{A taxa de expedición do DNI é de 12 euros e a do pasaporte 30 euros (para as familias numerosas esta documentación é gratuíta presentando o título).}

^{Esta unidade itinerante realiza toda la tramitación nun único día, de maneira que os usuarios reciben a súa nova documentación ao momento.}