- Dornas, gamelas e botes participaron na actividade promovida pola Fundación Rosalía e a asociación Dorna da Arousa
- A concelleira de Turismo e a Banda Municipal asistiron á saída da travesía dende a praia fluvial
Valga, 27 de xullo de 2025.
A homenaxe a Rosalía de Castro, a lembranza de Castelao e a cultura marítima galega converxeron onte na praia fluvial de Vilarello da man da Fundación Rosalía e da asociación cultural e deportiva Dorna da Arousa, organizadoras da “Inchadiña Branca Vela”, a remonta dos ríos Ulla e Sar en embarcacións tradicionais. Foi a décimo segunda edición da actividade, xurdida en 2013, cando se cumpriu o 150 aniversario de “Cantares Gallegos”, obra na que Rosalía describiu o navegar das embarcacións de vela río arriba coa seguinte estrofa:
¡Que inchadiña branca vela
antre os millos corre soa,
misteriosa pura estrela!
Dille o vento en torno dela:
«Palomiña, ¡voa!, ¡voa!»
Arredor de vinte embarcacións tomaron parte na singradura fluvial: O volanteiro “Piueiro, gamelas, galeóns, bucetas, un carocho, un bote de Ribadeo e dornas polbeiras, de tope ou xeiteiras. Algunhas partiron este ano dende Rianxo, ao cumprirse o 75 aniversario do pasamento de Castelao. Pero foi na área fluvial de Vilarello onde se reuniron todos participantes para, tralo xantar, poñer rumbo a Padrón.
A concelleira de Turismo, Malena Isorna, asistiu á botadura que, como é costume, foi amenizada pola Banda de Música Municipal de Valga, que interpretou varios temas, entre eles o himno Galego para despedir ás embarcacións.
